Stóra Laxá.

Stóra-Laxá fellur úr Grænavatni niður á milli Hrunamanna- og Gnúpverjahrepps, og fellur í Hvítá hjá Iðu, ásamt Litlu-Laxá. Hún er dragá, 90 km. löng all vatnsmikil með 512 ferkm. vatnasvið. Laxgeng er hún langt inn í Laxárgljúfur. Landslag með ánni er bæði fjölbreytt og mikilfenglegt.

Ánni er skipt í 4 veiðisvæði með alls 10 stöngum.  Þrjú  veiðihús eru við ána.  Hið efsta er við Laxárdal fyrir svæði IV. Þar eru 4 stengur notaðar.  Veiðihús fyrir svæði III er í landi Hlíðar. Þar eru notaðar 2 stengur.  Neðsta veiðihúsið er fyrir svæði I og II.  Það er í landi Skarðs.  Á þessum svæðum eru samtals 4 stengur notaðar. 

Meðalveiði áranna 1974 til 2008 er 313 laxar, minnst 76 árið 1980, en mest 2006, þá 709 laxar.  Leigutaki og söluaðili veiðileyfa er Stangaveiðifélag Reykjavíkur, sími 568-6050. Netfang svfr@svfr.is   Heimasíða www.svfr.is

Auk SVFR hefur Stangaveiðifélag Keflavíkur ráð á nokkrum dögum og sjálfir taka landeigendur smávegis veiði frá fyrir sig.  Eins og annarsstaðar á félagssvæði Veiðifélags Árnesinga ráðstafar svo veiðifélagið sjálft öllum leyfum dagana 10. til 20. ágúst.  Algengast er að leigutakar eða eigendur leysi þessi leyfi til sín og selji þau líka.