Tungufljót í Árnessýslu.

Um langan aldur átti Tungufljót upptök sín undir Langjökli sunnanverðum, og rann gegn um Hagavatn niður Farið, ofan í Sandvatn (eystra)  Úr Sandvatni runnu tvær ár; Sandá austur í Hvítá, og Árbrandsá suður Haukadalsheiðina.  Eftir sameiningu tveggja kvísla þar kallast vatnsfallið svo Tungufljót.  Meðan svo horfði var ætíð verulegt jökulvatn í Tungufljótinu.  En eftir að útrennsli Árbrandsárinnar var lokað og öllu jökulvatni veitt um Sandána, beint í Hvítá, hefur Tungufljótið verið hrein bergvatnsá, sem fellur í Hvítá, austan Spóastaða.

Reynt hafði verið að rækta Tungufljótið upp sem laxá löngu fyrr, meðal annars með gerð laxastiga í fossinn Faxa.  Árangur varð þó aldrei umtalsverður.  Það er fyrst fyrir fimm árum síðan, eftir að Lax-á ehf. tekur fljótið á leigu og hefur þar stórfelldar gönguseiðasleppingar, sem fiskgengd tekur verulega að aukast. 

Afli hefur vaxið úr ca. 90 fiskum árið 2005 upp í 2500 laxa sumarið 2008.  Fljótinu er nú skipt upp í tvö veiðisvæði – ofan og neðan við Faxa.  Á neðra svæðinu er veitt á fjórar til sex stengur en fjórar ofan við fossinn.  Eingöngu er leyft að veiða á flugu.  Gistiaðstaða er í ágætum smáhýsum, einu fyrir hverjar tvær stengur.  Mat og viðlegubúnað sjá gestirnir sjálfir um.

 Bókanir og nánari upplýsingar: Stefán Sigurðsson, skrifstofa Lax-á, s: 557 6100 eða stefan@lax-a.is