Veiðitölur
Smelltu hér til að gerast áskrifandi að angling fréttum
29. ágúst 2019

Nýjar veiðitölur

Komnar eru nýjar veiðitölur á vef Landsambands Veiðifélaga. Samantektin er frá veiði í lok síðasta miðvikudags 28. ágúst.

 

Veiði hefur dregist aðeins saman hjá efstu ánum okkar, veiðivikan er að skila færri löxum en veiðivikan á undan. Kærkomin úrkoma í síðustu viku bætti um tíma bágborin vatnsbúskap og lífgaði upp á veiðina en ítrekað lauma sólríkir dagar sér inn á milli og hafa stytt upp við fyrsta tækifæri. 

 

Sömu ár ríkja í efstu 10 sætum á listanum okkar en þær breytingar sem hafa átt sér stað á lista efstu 10 ánna eru að  Miðfjarðará fór úr 4. sæti í 2. sæti, Þverá/Kjarará fer upp um eitt sæti úr 6. sæti í 5. sæti. Laxá á Ásum fer úr 8. sæti í 7. sæti. Ekki bættist í hóp þeirra sem farið hafa yfir 1000 laxa markið en það eru þær fjórar Eystri-Rangá, Selá í Vopnafirði, Miðfjarðará og Ytri-Rangá. Á svipuðum tíma í fyrra höfðu 9. ár farið yfir 1000 laxa markið

 

Efst á listanum okkar er sem fyrr Eystri-Rangá með samtals 2652 laxa en síðasta veiðivika skilaði 96 löxum. Það munar 1352 löxum á henni og Selá í Vopnafirði sem er í 2. sæti með samtals 1300 laxa.

 

Í öðru sæti er Selá í Vopnafirði með samtals 1300 laxa sem er 78 löxum meiri veiði en á svipuðum tíma í fyrra.  Veiðivikan gekk vel, skilaði 133 löxum og vantar nú aðeins 40 laxa til viðbótar að hún nái lokatölu í fyrra sem var 1340 laxar.

 

Í þriðja sæti er Miðfjarðará sem komin er í samtals 1193 laxa. Síðasta veiðivika gekk vel og skilaði 102 löxum sem er aðeins minna en veiðivikan á undan. 

 

Í fjórða sæti er Ytri-Rangá en þar er veiðin komin í samtals 1184 laxa og síðasta veiðivika skilaði 78 löxum.

 

Í fimmta sæti er Þverá/Kjarará en þar er veiðin komin í 787 laxa. Síðasta veiðivika gekk vel og skilaði 136 löxum samanborið við einungis 14 laxa veiðiviku þar á undan.

 

Hér fyrir neðan eru tíu efstu vatnakerfin.

 

Til fróðleiks þá er veiði borin saman við svipaðan tíma í fyrra (29.08.2018) og í sviga má sjá hve miklu munar. 

 

1.  Eystri-Rangá 2652 laxar - vikuveiði 96 laxar. (-692)

 

2.  Selá í Vopnafirði  1300 laxar - vikuveiði 133 laxar. (+78)

 

3.  Miðfjarðará 1091 laxar - vikuveiðin 102  laxar. (-1008) 

 

4.  Ytri-Rangá 1184 laxar - vikuveiði 78 laxar. (-1590)

 

5.   Þverá/Kjarará 787 laxar - vikuveiði 136 laxar. (-1582)

 

6.   Urriðafoss í Þjórsá 735 laxar - vikuveiði 6 laxar. (-508)

 

7.   Laxá á Ásum 617 laxar - vikuveiði 51 laxar. (-7). Lokatalan í fyrra var 702 laxar og vantar 85 laxa til að ná því marki.

 

8.  Blanda 602 laxa - vikuveiði 30 laxar. (-255)

 

9.  Hofsá og Sunnudalsá 533 laxar - vikuveiðin 50  laxar. (-19)

   

10. Haffjarðará  530 laxar - vikuveiði 43 laxar. (-905)

 

Á stóra listanum er að finna áhugaverðar veiðitölur en þar eru meðal annars fimm ár þar sem veiðin er orðin meiri en lokatölur í fyrra. Jafnframt má geta þess að veiði í Laxá í Dölum gekk vel síðustu veiðiviku sem skilaði 132 löxum sem er besta veiðivika til þessa.

 

Svalbarðsá er komin í samtals 381 laxa sem er 44 löxum umfram lokatölu í fyrra en þá veiddust samtals 337.

 

Skjálfandafljót er komið í samtals 300 laxa sem er 50 löxum umfram lokatölu í fyrra sem var 250 laxar. Jafnframt hafa þar veiðst 150 silungar.

 

Það gengur vel í Hafralónsá sem er komin í samtals 287 laxa sem er 93 löxum meira en lokatala í fyrra sem var 194 laxar.

 

Deildará er komin í samtals 176 laxa sem er 14 löxum meira en lokatala í fyrra sem var 162 laxar.

 

Fnjóská er komin með 137 laxa og 204 silunga. Laxveiðin er komin 11 löxum umfram lokatölu í fyrra sem var 126 laxar og stutt að silungsveiðin fari upp fyrir lokatölu í fyrra sem var 213 silungar.

 

 

Hér er hægt að skoða lengri lista með veiðitölum úr tæplega 50 vatnakerfum. Sjá nánar hér. 

 

Ekki hafa borist veiðitölur úr öllum vatnakerfum en þær verða settar inn þegar þær berast. Það getur verið erfitt að ná tölum í hús þegar vel er liðið á veiðitímabilið, eins og lesa má í frétt með samantektinni fyrir viku síðan.

 

Söfnun veiðitalna væri ekki möguleg nema fyrir liðsinni fjölda aðila sem vikulega taka saman veiðitölur og má þar nefna veiðiverði, veiðileiðsögumenn, matreiðslumenn, starfsfólk veiðihúsa, leigutaka, veiðiréttarhafa, árnefndarfólk og fleiri. Eiga allir þessir aðilar þakkir skildar fyrir. 

 

Ágætt að hafa eftirfarandi í huga ef grunur leikur á að veiddur lax sé eldislax. Mjög mikilvægt er að sleppa honum ekki og tilkynna viðkomandi stofnun.

 

Hér er hægt að kynna sér leiðbeiningar um samanburð á villtum lax og eldislax hér.

 

Geta má þess að hreistursýnataka af veiddum fisk er eitt mikilvægasta framlag veiðimanna til rannsókna. Fjölmargt má greina í hreistri og t.d. er hægt að sjá hvort fiskur sé af eldisuppruna. Sjá nánar fróðleik um hreistursýnatöku. 

 

Í ljósi þess að mun minna er af laxi í sumum ám þá er ágætt að hafa tilmæli Hafrannsóknastofnunar í huga um að veiðimenn og veiðiréttarhafar gæti hófs við veiðar og sleppi sem allra flestum löxum sem veiðast til að hrygningarstofn haustsins verði sem stærstur.

 

Annars er hætta á að sá seiðaárgangur sem undan þeim kemur verði einnig smár og veiðiþol laxastofna minnki enn frekar. Hér er hægt að lesa áskorun í heild sinni.

 

Athygli er vakin á að velkomið að senda inn veiðitölur úr öðrum vatnakerfum og við birtum þær hér á vefnum. Einna best er að fá veiðitölur í lok veiði miðvikudags kvölds en það gerir samanburð fróðlegri og auðveldari. Gott er að láta stangarfjölda fylgja og veiði á silung er auðvitað vel þegin.

 

Hægt er að senda inn veiðitölur á bjorn@angling eða hringja/senda sms í síma 852-3398